Dilli ki Sardi (this post is in Hindi)

Delhi in Winter

 

Lo, ek baar phir se thand aa gayi hai. Agar Dilli ke context mein is mausam ko dekha jaaye to ye aur bhi zyaada romaani aur artful lagta hai. Sirf 2-3 mahinon ki is aalas se bhari, kambal-razaai mein lipti aur dhundh se dhaki thand agar na hoti to Dilli kitna weeraan hota. Aur ye to sheher hai, mahanagar…iski to weeran hone ki gunjaaish kitna zyaada hai. Thand, ya thandapan, aksar maut se relate kiya jaata hai. Ek negative connotation. Magar thand ka mausam ek khushi ka representative hai, like the ads say, ‘the festive season’. Aur sach bhi hai. Sirf Dussehra, Diwali, Christmas aur new year hi nahi, is thandi Dilli mein beesiyon art aur ‘cultural’ festivals hote hain. Film ho, theatre ho, dance, music ya phir wo bourgeois mele jismein culture ke naam par 2-4 item number aur ‘fun’ ke naam par chaar cheh games hote hain. Sabke liye kuch na kuch hota hai karne ko jo ki logon ki roz marra ki zindagi se alag aur naya hota hai. Is baar ek bada film festival (DIFF) ho raha hai, har saal ki tarah January mein NSD ka Bharangam hoga, aur bahut se chote bade festivals honge. Ticket ki bhaaga daudi agar June ki tapti dhoop mein ki jaaye to cinema ya theatre dekhna ka mazaa aana namumkin hai. Magar wahin agar January ki jama dene waali thand mein subah 6 baje uthkar line mein lagne ki baat ho to mazaa kuch aur hi hai. Jab cigarette jalaane ke liye haath jeb se bahar nikalne mein takleef ho to samajh lijiye ki Dilli ki sardi apni shiddat pe hai. In sab activities se pare ek aur bahut bhaari taadad mein jo karyakram hota hai wo hai shaadi. Kisi ki bhi ho sakti hai. Aapke bhai, behen, dost, chacha ke ladke ki ya phir us puraani girlfriend ki. Saj dhaj ke, raja babu ban ke sab apne gharon ko taala maar kar nikal padte hain chaat aur chicken tikka dabaane. Dance bhi hota hai, zara sardi ko balance karta hai. aur thoda whisky ya rum to zaruri hai chahe gaadi ki dikki mein se nikaal ke piya jaaye ya khulle aam counter ke upar se. agar chattarpur ke kisi farm house mein shaadi hai to to mazaa hi aa jayega. Khulla maidan, aag ke bade jalte huye chulhe aur unke neeche daant katkatati auntiyaan jinko agar aap gaur se dekhein to backless blouse ke saath sirf ek 5 gaz ki saadi lapete khadi hain.

Itni thand mein log kaam par kaise jaate hain? Ye samajhna at least meri samajh ke bahar hai. Itna zaruri kaun sa kaam hai jise karne ke liye log naha dhoke, murjhaaye suraj ke tale apni gadiyon, buson aur metro ki taraf nikal padte hain? Par phir khayal aata hai school ke dinon ka jab subah uthna hi padta tha, nahana chalo taal bhi diya magar thande thande kapde to badan par daalne hi padte the. Jab duniya tuitions ke ird-gird hi chalti thi to subah 6 baje bhi uth kar, aadhi neend mein, scooter ko kick maarte huye bahut se din barbaad kiye hain. Pull par jab second gear pe scooter chadhta tha to naak ke neeche halki jami huyi baraf ki parat hothon ko sunn kar deti thi. Tab kyun nikalte the ghar se bahar? Shayad us adventure ki talaash mein jo garmiyon mein kabhi nahi mil sakta.

Kahin na kahin aisa bhi lagta hai ki kitna bhaaichaara badh gaya hai is hamesha naaraz rehne waale sheher mein. Horn kam sunaayi dete hain, log kam chillate huye nazar aate hain aur bheed bhi sham dhalte dhundh mein badal jaati hai. Ye sab shayad ek personal wehem hi ho, magar sacchayi se kahin behtar hai.

Advertisements

2 thoughts on “Dilli ki Sardi (this post is in Hindi)

Add yours

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Blog at WordPress.com.

Up ↑

%d bloggers like this: